ا سٹیٹ بینک کی 500 روپے کے نوٹ سے متعلق وضاحت

او وی آئی پرچم کے بغیر 500 روپے والے نوٹ کے حوالے سے سوشل میڈیا کے بعض حلقوں میں زیر گردش خبروں پر اسٹیٹ بینک پاکستان نے وضاحت جاری کردی۔ اسٹیٹ بینک پاکستان کی جانب سے جاری اعلامیہ کے مطابق 500 روپے کا نئے ڈیزائن والا نوٹ 2006ء میں متعارف کرایا گیا تھا، پہلے سے مختلف سائز، ڈیزائن اور رنگ کے حامل ان نوٹوں میں جدید ترین سیکیورٹی خصوصیات موجود ہیں، بعد میں ایک اور سیکیورٹی خصوصیت بھی شامل کردی گئی یعنی آپٹیکل ویری ایبل انک (او وی آئی) سے بنا ہوا رنگ بدلنے والا پرچم بھی ان نوٹوں پر ثبت کیا گیا تاکہ جعل سازی کی روک تھام کو مزید مؤثر بنایا جاسکے اور عام افراد اصل نوٹ کو
بآسانی پہچان سکیں۔
اسٹیٹ بینک کا کہنا ہے کہ نئے نوٹ کے نتیجے میں 500 روپے کے دونوں طرح کے نوٹ دستیاب ہوگئے، یعنی 2006ء سے 2009ء تک جاری کئے گئے بغیر او وی آئی والے نوٹ اور 25 جنوری 2010ء سے مؤثر ہونے والے نوٹ جو او وی آئی خصوصیت رکھتے ہیں چنانچہ تمام متعلقہ فریقوں کے مفاد میں یہ واضح کیا جاتا ہے کہ نئے ڈیزائن والے 500 روپے کے نوٹ خواہ ان پر او وی آئی پرچم ہو یا نہ ہو، اصلی ہیں بشرطیکہ ان کی بقیہ دیگر سیکیورٹی خصوصیات درست ہوں۔